ღღ مــــدونــــه مــــوظـــــف ღღ

رثام · 13-03-2009, 12:20 AM

السلام عليكم ورحمة الله وبركاته ..

مرحبا ..

قبل اسبوع تقريباً ..

كتبت موضوع عن : " تصرفات المراجع و الزبون " ..

وذكرت السلبيات والايجابيات ..

وبعض الردود من الاخوة والاخوات اعترضوا ..

وطلبوا مني ذكر سلبيات " الموظف " ..

يعني مب الزبون او المراجع دومه على خطأ ..

"ساعات " الموظف عليه بعض السلبيات ..

فكرت من الافضل ذكر سلبيات " الموظف " على شكل

" مفكره " .. :

* يبدا الفجر .. البعض ينش بنشاط ( لأنه راقد من وقت ) .. والبعض ينش ( يجر أذيال الخيبه ) .. والبعض ( يغفل 5 دقايق ) يبا يشبع رقاد ..

* بعض الموظفين لازم يتريقون كل يوم ( بدون الريوق ما شي طاقه يعني ما يرومون يشتغلون ) .. البعض الآخر ما يداني الريوق ( شرات حالاتي ).

* يوصل الدوام تلقى الوجه يشع من الحيويه .. أو تلقى الوجه منفخ وعاقد حياته ( حواجبه ) .. وما يبتسم .

* يا حظ اللي يجابل النوع الأول ( بو وجه بشوش ) بيخلص لك كل امورك قد ما يقدر .

خلنا عقب سرد الخطوات من البيت للدوام .. وخلنا ندخل مكاتب الموظفين .. واماكن عملهم :

+ موظف يوقف المراجع جدام مكتبه وهو داق سوالف وضحك ويا الموظفين .. أو احد المراجعين ( المعروفين ) .

+ موظف تدخل مكتبه وهو يحتفل على طاولته ( سندويشات وكيك أو اكلات شعبيه ) وتارك الناس يتريونه يترس بطنه .

+ موظف من تسلم عليه رفع راسه وشافك بنظره ( خايسه ) .

+ موظف ماسك السماعه او الموبايل داق سوالف ويا الاهل أو الربع واذا رمسته يقولك : لحظه .. واللحظه تتحول لساعات .

+ موظف جالس فمكتب زميله وتارك مكتبه او مكانه شاغر ( والمراجع يدق راسه وين ما يبا ) .

+ موظف يحدد لك موعد لانجاز المعامله .. ومن تراجعه تشوف كومه معاملات جدامه .. ويطلب منك المراجعه عقب أسبوع .. ( استقيل ابرك لك )

+ موظف الامر بايده يخلص لك معاملتك .. ولكن يطلب منك مراجعه الموظف الثاني ( مب فاضي يجابل شغله ) .

+ موظف تدخل عليه وتلقى محول مكتبه لمجلس .. وعندك امر خاص تبا تقوله .. يحرجك جدام الجميع ويقولك : خبرني عن مشكلتك .. ( الكل يشاهد مسرحيتك وهم يهمسون ويضحكون عليك) .

+ موظف مشحون من البيت ( مصفوع .. عاقين عليه كلمه ) ومن يدش عليه مراجع فقير .. يبرد حرته فهالمراجع .

+ موظف واصل متاخر من الزحمه ( تلقى الدخان ظاهر من خشمه ) من يدش عليه مراجع يرد عليه : " اطلع برع " .

+ موظفه دش عليها مراجع وهي تتعدل ( فاضيه ) وحاسر .. من يدش عليها مراجع تطرده وتقول له : صدق ما تستحي .. واذا دش ( كومار أو بيتر ) تبتسم له وتاخذ عنه الشاي أو القهوة .

+ موظفه ترمس الشغاله ( تيلفون ) تشرح لها شو تسوي لعيالها ؟؟ وكيف تطبخ ؟؟ وكيف تدير البيت ؟؟؟.

+ موظفه من يدش عليها شخص عصبي او ملسون من كلمه وحده وجدام الجميع ( تنزل دمعتها ) .

+ موظفه مع زميلاتها ماخذات راحتهن من الضحك والصراخ والسوالف والصوت واصل آخر الادارة او تلقاهن متجمعات مع الموظفين ( الرجال ) دون حدود أو حياء ( الله يرحم أيام زمان ) .

+ موظف تشوف طاولته او مكتبه ترس أوراق وملفات .. لا ترتيب ولا شياته ( تلوع جبدك وانته تشاهده ) ويدور معاملتكوما يلقاها .

+ موظف يا كثر استئذاناته وغياباته بسبب وبدون سبب ( لا ضمير ولا ذمه ) تارك امور الناس معلقه .

+ موظف يسهل مهمات ويحل مشاكل ( صنف معين من النساء ) والصنف الآخر الحشيم عليهن يترين الدور او ما يسويلهن سالفه .

+ موظف مجابل النت او الكمبيوتر يتابع ( البورصه ) وتجارته .. المهم يخلص اموره الخاصه .

وهناك العديد من الظاهر ..

والمفكرات اليوميه للموظف ..

مفعمه بالسلبيات والايجابيات ..

وهذا اللي اتذكره فالوقت الحالي ..

السموحه ..

footballgirl · 13-03-2009, 10:29 AM

هلا رثام..

بالفعل عزيزتي ما ذكرته واقعي..

ولكن دائما وأبدا يجب على الموظف
أيا كان وأيا كان منصبه أن يحس بقيمة الأمانة المسداة اليه ولا ينسى أيضا أنه يتقاضى أجر على مهامه الوظيفية .. بالتالي يجب أن لايبخس المراجع حقه...

صحيح أن كثير من الأشخاص ليس لديهم القدرة على فصل أمورهم الشخصية عن العمل عن الأشياء الأخرى حتى.. بالتالي يجب أن يكون الموظف مؤهل نفسيا أولا ثم وظيفيا.. وهذا بالطبع ما يصعب تطبيقه..

لك مني أطيب تحية على تواصلك الجميل ..

**الميقاتــي** · 13-03-2009, 11:40 AM

الموظف إنسان فحياته الشخصية لابد ن تؤثر على عمله .. فإن كان مرتاحا فسوف تراه يعطي العمل بحماس وجديه ونشاط .. وإن كان عكس ذلك فسوف تراه عصبيا وليس له طاقة للعمل .. وينفجر في وجه المراجعين لأتفه ألأسباب ..

عموما .. الإنسان في كل حالاته سواء كان طالبا أو موظفا أو مراجعاأو أو .. يبقى إحساسا وتحركه وتتحكم فيه العواطف والظروف المحيطه به ..

ثانكس رثام على المشاركة ..

رثام · 13-03-2009, 02:34 PM

footballgirl

مرحبا ..

لقد قامت اغلب الدواير باعداد دورات للعديد من الموظفين ..

لتعلم الاخلاقيات وثقافات العمل والتعامل مع الجمهور ..

ولكن ..

هيهات ..

قد تكون ثواني وتزول ..

ويرجع الحال كما هو ..

وهنا ااتب المسئول الذي يترك الامور هكذا ..

مودتي ..

رثام · 13-03-2009, 02:38 PM

الميقاتــي

أجل أخي ..

ولكن ..

ما ذنب من يتعامل معه ..

أذكر في يوم دخل مراجع مكتبي ..

وكنت في ذاك اليوم متضايقه من تصرف مراجع دخل قبله ..

لم ابتسم وكنت جافه التعامل ..

فسألني : " اختي بلاج ؟؟؟ برجع لج باجر " ..

هنا أدركت فداحه تصرفي وتاسفت لذاك المراجع وشرحت له ..

فتفهم الموقف ..

أخي نحن كتله احاسيس ..

ولكن علينا ادراك ان المراجع لا ذنب له ان كان انسان ذوق في التعامل ..

كل التحايا يا ذوق ..